Starfsfólk  |  EN  |  ISL  |    |  

Fræðibókasafn

Bókasafn Halldórs Ásgrímssonar og Önnu Guðnýjar Guðmundsdóttur, sem Anna Guðný gaf Héraðsskjalasafni Austfirðinga á Egilsstöðum (sbr. gjafabréf dags. 17. apríl 1974) myndar grunn að núverandi bókasafni Héraðsskjalasafns Austfirðinga.

Til að viðhalda bókasafninu er ráðstafað ákveðinni upphæð af fjárhagsáætlun Héraðsskjalasafnsins ár hvert. Þar af leiðir að í safninu er að finna nýtt efni í bland við gamalt, þar eru m.a. mörg sjaldgæf eldri rit. Við innkaup á bókum í safnið er einkum litið til fræðibóka af ýmsu tagi, þó annars konar efni megi einnig finna þar.

Í lok árs 2018 var heildarfjöldi eintaka um 16.600 en nokkuð er um tvítök. Titlar eru um 5.250 og eru margir þeirra nokkurra binda verk. Bókasafninu tilheyrir einnig veglegt safn tímarita, þau eldri mörg innbundin, alls um 500 titlar. Enn bætist við tímaritasafnið því um 40 titlar eru í áskrift.

Auk bókanna tilheyrir bókasafninu veglegt safn tímarita, sum þeirra innbundin, alls hátt í 500 titlar. Bæði er um að ræða tímarit sem enn eru gefin út en einnig tímarit sem hætt eru að koma út, þ.á m. tímarit frá 19. öld. Líkt og með bækurnar eru þau tímarit sem safnið kaupir flest fræðilegs eðlis og eru tímarit sem birta sögulegt efni (í einhverri mynd) þar einkum áberandi.

Héraðsskjalasafnið leggur sérstaka áherslu á að safna útgefnu efni frá starfssvæði safnsins, á þar jafnt við um bækur, tímarit eða staðbundna prentmiðla.

Á 10 ára afmæli Héraðsskjalasafns Austfirðinga árið 1986 var jólakort safnsins helgað minningu hjónanna Halldórs og Önnu Guðnýjar sem áratug áður gáfu nýstofnuðu Héraðsskjalasafni bókasafn sitt, sem taldi liðlega 4.600 bækur auk fjölda tímarita og bæklinga.

Halldór og Anna

Anna Guðný Guðmundsdóttir, f. 1895 d. 1978, var kennari að mennt og stundaði kennslu bæði á Borgarfirði og Vopnafirði.
Halldór Ásgrímsson, f. 1896 d. 1973, var samvinnuskólamaður og kaupfélagsstjóri. Þau hjón voru bæði mjög virk í félagsmálum, hvort á sínu sviði, og kjörin til ýmissa trúnaðarstarfa. Halldór var þingmaður Austfirðinga um 20 ára skeið.

3.12.2019

 

Leita að bókum Héraðsskjalasafnsins

Héraðsskjalasafn Austfirðinga

Laufskógar 1, 700 Egilsstaðir

Sími: 471-1417
Tölvupóstur: heraust@heraust.is

Senda fyrirspurn

Héraðsskjalasafn Austfirðinga er byggðasamlag á vegum sveitarfélaga á Austurlandi. Safnið starfar samkvæmt lögum um opinber skjalasöfn frá árinu 2014 og er sjálfstæð skjalavörslustofnun en lítur faglegu eftirliti Þjóðskjalasafns Íslands. Megin hlutverk safnsins er að taka við skjölum og hafa eftirlit með skjalavörslu aðildarsveitarfélaga sinna og stofnana á þeirra vegum. Í safninu er ágæt aðstaða fyrir fræðiiðkanir.

Öll söfnin í héraðsskjalasafninu - skjalasafnið, ljósmyndasafnið og bókasafnið - stækka ört og luma á margvíslegu efni sem nýst getur við fjölbreyttar rannsóknir, hvort sem þær eru unnar af fræðimönnum, nemum eða öðrum sem kjósa að nýta sér safnkostinn. Margs konar gögn eru í skjalasafninu, þar má t.d. leita upplýsinga um örnefni, landamerki eða um starfsemi félaga sem afhent hafa safninu skjöl sín.

© Héraðsskjalasafn Austfirðinga 1998-2022